近年新加坡經濟增長驚人，自金沙雲頂賭場開咗之後，已有不少本來對新加坡冇乜興趣嘅朋友，去咗新加坡渡假，過長周末。左丁山上次去新加坡，已經係1994年，記得當時嘅商業中心區係ShentonWay，文華東方酒店在新填海區Marina開業，人人都話太遠，太僻。聽講話依家完全唔同晒咯喎，新加坡出現好多宏偉新型建築物，靚過香港中環多多聲。
好奇心油然而起，應該去新加坡行一轉，update吓嘞。適逢馬主協會舉辦一個賽馬旅行團，到新加坡為香港參賽馬「蓮華生輝」、「綠色駿威」、「加州萬里」與「魔法幻影」捧場，合晒心水噃，於是報名參加，上星期五就到咗新加坡，入住MarinaSquare嘅PanPacific，鄰近就係文華東方，文華（新加坡），與RitzCarlton，有天橋相通，連接埋香港大富豪投資興建嘅SuntecCity。呢座「城」共有五幢寫字樓大廈，加埋一個會議展覽中心，規模可算宏偉，只是落成已有一段時間，恐怕未必夠金沙賭場酒店與會展中心競爭咯。
到埗check-in之後，已是下午三時，問酒店禮賓部附近有冇魚蛋粉之類小食，職員介紹行天橋到Suntec會展中心地下，有「吃粥自助餐」，四點鐘收工。啱噃，急急腳行過去一睇，原來有幾款粥任食，配料就係「潮州打冷」，有十幾二十款地道小吃，任揀，嘩，一時貪吃，擺咗十幾碟「福建」、「潮州」小吃上枱送白粥，食完飽到唔識行，每位盛惠坡紙十二溝八，乘以六點四四，計番港紙就八十幾蚊，唔算便宜噃。
一來為咗幫助消化，二來為咗認識環境，左丁山索性走出地面，預備在MarinaSquare行一個圈返回酒店，點知道街道就靚嘞，周圍大樹參天，環境之佳，在中環無法想像，但行吓前面阻路，過馬路冇交通燈，再行一半又封住造工程，唔怪得路面上好少行人，唯有走番入商場上天橋，商場內就人頭湧湧咯。新加坡可能天氣太熱，無人鍾意在室外路上散步，故此街道建設亦不注重行人之方便。