冰島火山近期爆發，大規模火山灰吹襲歐洲各地，擾亂飛機航班，角逐歐聯決賽嘅巴塞隆拿，為安全計決定周二連夜出發到倫敦，不過就冇球場練習。位於倫敦嘅阿仙奴就幫手，借出主要練習場畀巴塞用，到底領隊雲格會唔會有陰謀呢？
法比仔出面申請
巴塞原本周四先啟程去倫敦，準備喺溫布萊踢周六舉行嘅歐聯決賽；不過吸收上季教訓，因火山灰搞到作客米蘭出現延誤，首回合輸畀國米1:3，令球隊歐聯準決賽出局，為安全計，巴塞就周二連夜出發，周三凌晨到埗。原本早到倫敦，最多咪畀多兩晚酒店錢，不過最大問題係冇場練習。
英國《每日郵報》報道，阿仙奴隊長法比加斯為幫母會，就向球隊申請，借出練習場。原本阿仙奴同巴塞就冇咩交情，阿仙奴仲挖走唔少巴塞青年軍，雙方對簿過公堂，而阿仙奴亦連續兩屆歐聯俾巴塞淘汰，照計雲格冇理由咁順攤，實有咩陰謀。
首先，巴塞決賽對手係曼聯，曼聯呢幾季威盡英超，間接令阿仙奴連盃仔都冇得捧吓，本住敵人嘅敵人就係朋友嘅原因，既然皇馬教練摩連奴都過料畀曼聯領隊費格遜，雲格當然希望巴塞搞掂曼聯。
而且，雲格知法比加斯回歸巴塞嘅心意已決，早排寧願返西班牙睇F1，都唔睇阿仙奴聯賽煞科戰，今次賣個人情畀巴塞，等巴塞可以畀足4,000萬鎊（約5億港元）轉會費，來季送走法比仔，到時咪可以動用3,500萬鎊買雲格心儀嘅賓施馬。
最後一個陰謀，就可能已經喺呢個干尼練習場裝滿偷拍攝錄機，事關阿仙奴呢幾年都俾人講想學巴塞地面戰，連4-3-3陣式都有巴塞影子，不過東施效顰，始終學唔到巴塞點捧盃，今次仲唔偷師？
