食典：超掯歐冠杯　火辣飲落肚

「星期六晚睇歐聯啦。」今個星期聽得最多係呢句說話，曼聯雖然掄元英超，西甲冠軍巴塞卻俾人睇高一線，香港球迷個個飲英國波奶水大，點唔撐先？歐聯總決賽周日2:45am開波，蒲吧齋飲真係有啲寡，今日推介老尖兩間最強酒吧，就算踢到加時射埋十二碼，打到天光都唔驚餓親。

記者：朱崇德
攝影：林栢鈞
Model：YoYo&Janelle

老實講我一般好波，平時豬朋狗友叫我落吧睇波，真係睬佢都儍，不過本周末歐聯大戰兼周日放假，加上靚女YoYo同Janelle叫到，二話不說Sayyes啦。上個禮拜佢哋帶我落老尖「M&W」，異口同聲話BartenderSam好靚仔，佢新落場唔夠一個禮拜，馬上顯功架，叫佢調校杯Cocktail，Sam話：「一早諗定特色Cocktail『歐冠杯』，平時砌杯塔，多數係啲人懶型為媾女，無主題為砌而砌，歐聯嗰晚意義唔同，火光紅紅藍藍咁，邊隊奪冠都襯晒色，做祝酒啱晒。」雖然把口幾滑頭，不過手勢絕無揸流攤，塔底用Kaluha同Galliano做膽，再混合Bailey's、BlueCuracao同Sambuca，杯塔着晒火，入口有陣陣咖啡酒香，又略帶呍呢拿香味，最正係點火後酒香完全揮發，入口更香醇。採訪當日，影完相同兩個靚女劈咗成晚啤酒，埋尾先隊埋呢杯掯嘢，我認，嗰刻我個頭有啲Wing，兼有少少行唔到直線。

■BartendorSam，夜場玩噴火指定動作，六呎火龍有幾震撼？上《蘋果網睇片》啦！

睇波環境？正到無嘢好講，五千呎總舖面有超過二百個座位，擺枱密度唔高，唔會坐到背脊貼背脊，坐得幾舒服吓。最無敵係呢間場有超高樓底，差唔多有成兩層樓高，四面牆總共有六部超過100吋大投射，幕底仲要Set到過人頭高度，完全無死角，唔會俾人遮住視線，唔使睇到頭岳岳，就算遇到啲無啦啦企起身亂嗌又或食玻璃大者，都唔使頭痕。
伴酒小食以泰式小食為主，大廚係有超過十年煮食經驗嘅正宗泰國人，泰燒串燒、酸辣鳳爪同生菜包等，全部做得幾Light，唔油膩送酒一流，絕非一般酒吧求其墊塊生菜掟塊番茄嘅叮叮小食可比。至於調味，為迎合香港人口味，會有偏向少辣情況，都係嗰句，食得辣嘅咪出句聲囉。
大食啲嘅，呢間場仲提供BBQ任飲任食套餐，人頭每位$350，最少15人可訂位，酒吧接連一個超過一千呎陽台，既風凉水冷，亦方便你吞雲吐霧。食物方面，豬牛雞蝦等基本大路嘢必備，有人幫你開埋爐，連拮雞翼都唔使自己動手，啱晒我哋呢亭懶人。最重要係，價錢包埋全晚酒水（連大酒）任飲及卡拉OK房任玩，自成一角睇波又唱歌，開心好多o架。畀貼士，訂位情況暫時半滿，仲有位走盞，想訂位唔該手快。至於鍾意齋飲嘅，一樣有抵酒飲，只要喺歡樂時光即9:30pm前入座，就算你過鐘唔走飲到天光，都以半打啤酒$126優惠價計數，變成賺埋黃金時段酒錢，係唔係抵先？

■120吋大投射，場內有兩部，保證睇波睇得舒服。

■地方大到可以設掟鏢區，總共有六部掟鏢機，逢周一有酒吧鏢隊駐場。

■一個人撐場都唔怕，照例有靚靚BarGal陪你猜枚。

■室外陽台BBQ，仲玩埋燈光效果，幾有Feel。

傑斯上身$70
用Gin、Vodka、Rum、Tequila、TripleSec做膽，再用可樂撞起，入口哋唔覺酒味極重，但到頂隨時唔知，好易令人做錯事，例如──落錯飛咁啦。

巴塞三叉戟$70
巴塞話明用美斯、韋拿同柏度做三箭頭，呢杯三叉戟都用Vodka、Galliano同橙汁三大主力做膽，正所謂酒多過果汁，飲落度數都幾高，有啲火氣o架。

凍結美斯$80
曼聯話明用朴智星凍結美斯，Sam用士多啤梨、白谷咕溝菠蘿汁做Cocktail。入口有如奶昔，凍就凍喇，不過飲極唔到頂，啱晒真不勝酒力或扮矜持嘅女仔飲。

想舒服睇歐冠盃決賽，清吧斯文場或者係你杯茶，「Imagine」屹立尖嘴超過十年，經理William話：「我哋無話捧邊隊，但唔知係咪全店玩血紅主調色，曼聯躉特別鍾意嚟呢度聚腳。」全店有約百七個座位，絕大部份都係梳化卡座同長座，唔係咕凳仔，飲住酒等睇波舒服好多，「我間場最大特色，係一張有逾六米長吧台，呢度文化似鬼佬酒吧，來一杯，傾偈睇波Hea成晚，有風味好多。」睇波亦全無死角，吧枱位有兩部34吋電視，其餘店內還有兩部50吋LCDTV，及兩部70吋投影電視，話明就算加時射埋十二碼，都一定等埋頒獎先收檔，梗係啦，大家都係波迷嘛。
「Imagine」直頭當歐冠盃總決賽係節日咁搞：「嗰晚入場，我哋會送杯WelcomeDrink，不論男女總之着波衫入場就有份。」Welcomedrink有兩杯，分別係紅魔曼聯同藍色巴塞，前者用Vodka、Peach溝金巴利汁，雖然入口有如啫喱般清甜，不過Vodka味極掯；後者都係用Vodka做主打，配TripleSec橙皮酒及鮮青檸汁，酒味一樣重，不過Refreshing好多。

火燄金字塔$506
呢間場一樣玩杯塔，用Kakula、Bailey's、Galliano、Bacardi151及BlueCuracao溝成，一塔玩三杯開心Share！

■70吋大投影電視，配中等場Size，夠熱鬧。

■愛死呢個特巨玻璃窗，一樓位睇街景，爽爆！

■紅色做主調色，紅魔鬼躉啱晒啦。

■Welcomedrink，（左）紅魔曼聯，藍色巴塞。

至於酒吧小食，呢間場一切從簡，炭燒雞泡魚乾、脆炸墨魚嘴，係最Light伴酒王牌。為食嘅我推介極重英式風味嘅海鮮拼盤，$58巨到無倫！薯條、墨魚餅、魷魚鬚及蝦餅瓣瓣齊，老實，呢個係食得飽嘅二人份量囉。
另一推介蝦膏海鮮炒飯同冰鎮鮑魚，都係一般酒吧少見，難得做得唔油膩，兼極鮮味！William風輕雲淡講句：「點講都係酒吧小食啫，份量多，因為我哋只係想收番成本價就算，嚟飲酒先至係呢度最大樂趣。」啱聽，我Buy。

食典：超掯歐冠杯 火辣飲落肚

食典：超掯歐冠杯　火辣飲落肚