名牌有A貨，名人嘅微博亦有A貨，邊位名人俾人假冒？咪係四叔李兆基囉！
話說噚日本報大篇幅報道四叔李兆基個大仔、恒地（012）副主席李家傑，幫助內地患咗白血病同血友病嘅小朋友樂樂張哲粼嘅善行，令到唔少善心人為之動容。報道仲引述「四叔李兆基」微博留言，話「雨夜過後就會綻放艷陽，天會賜給樂樂力量，願佢將痛苦化造力量，戰勝病魔！」
華華睇完，第一個反應係──四叔真係in，有自己嘅微博。不過，上去微博睇吓佢其他留言，就覺得有啲唔對路。
好似星期二微博留言話「我記得啦！梗係07年嗰陣，有一日我約咗當時喺港大做副校長嘅李焯芬先生一個飯局，傾關於港大籌款，我當時應承咗捐5億港元；跟住我返到寫字樓，急不及待即刻打電話俾你，叫你一齊共襄善舉，而你又好爽快二話不說咁即刻應承捐4億，但係你又驚俾人話捐錢多過我，所以你捐呢個數。」仲附有一幅四叔同彤叔鄭裕彤嘅合照。佢兩個都有頭有面，四叔又點會將同彤叔討論捐錢嘅對話公開。
與彤叔對話露馬腳
果然不出所料，華華收到恒地公關大員顏雪芳（Bonnie）電話，話個微博係A貨，四叔根本就冇開微博！咁邊個咁有心義務「幫」四叔呢？Bonnie話佢都想知，皆因佢哋check番，個A貨微博舊年10月開，魚目混珠咗好耐。唔知新浪睇到呢個訊息，會唔會做嘢呢又？
李華華
mailto:[email protected]