卓韻芝7月13號喺演藝學院開處女talkshow「卓韻芝死去活來OneNightStand」，暫定五場，佢早排影海報，搵咗電影《少林足球》嘅士巴拿哥哥馮勉恆、健美先生阿Real同阿芝婆婆粉墨登場。
婆婆粉墨登場
阿芝影相時被折磨倒吊六小時，佢噚日喺電話話：「開會時係諗巴黎鐵塔反轉再反轉，所以玩倒吊，我以為影完相執咗佢就搞掂，點知真係要倒吊。」
阿芝影完相，食飯時開始頭痛，後來隻手起晒沙，返到屋企仲發現肋骨傷晒有血痕，三日後散咗，但都仲有好多紅點。問佢點解搵婆婆幫手？阿芝話喺屋企煩緊點影相時，婆婆走嚟逼佢飲苦茶，又話最衰幫唔到手，阿芝於是叫婆婆一齊影，婆婆話：「都冇人同我恤髮。」整頭又點會慳？婆婆好快應承。阿芝本來想請婆婆上台做嘉賓，但佢話：「未必喇，老人家8點出街已經好夜，希望佢嚟睇啦。」