華華前兩星期講過，私募基金第一東方拍住全日空ANA搞嘅日本首間廉價航空公司叫「鴻圖」，噚日，第一東方老闆諸立力開埋個英文名叫「Peach」。
佢話，原來要改一個中國、日本同西方文化都接受到嘅名並唔容易，佢收到過千個提議，但自己鍾意嘅Jade唔用得，事關俾中航客運用咗。最後，揀咗BrandArchitect專家CIAInc提議嘅Peach，即係桃。有27年歷史嘅CIA唔嘢小，大家熟悉嘅UNIQLO就係出自佢哋手筆。
講開諸立力，除咗Peach大展鴻圖，佢俾德國基爾世界經濟研究所選為本年度「全球經濟獎」得主。大家對呢個獎可能唔係咁認識，但得獎人都有番咁上下，好似今年，同諸立力一齊得獎嘅包括歐洲央行行長特里謝、諾貝爾經濟學獎得主卡尼曼，同美國前財政部長拉里．薩默斯。
作為首個得到呢個殊榮嘅華人，諸立力話，連佢自己都唔知點解會被選中。