張栢芝昨日在台灣慶祝31歲生日，特地帶埋3歲長子Lucas與小S徐熙娣的女兒及范瑋琪的姪仔等享受親子樂，齊齊到信義誠品書店畫畫和買玩具。不過，一向活潑好動的Lucas，昨日雖然有大班小朋友陪玩，但Lucas看來有點悶悶不樂，就算玩火車也未見露出笑容。
張栢芝跟徐熙娣、范瑋琪一向老友，每次她到台灣定必一聚，就算栢芝生下Lucas和Quintus，也會帶埋囝囝赴台跟好姊妹的子女享受親子樂，如09年，栢芝便帶同一歲多的Lucas赴台跟老友見面，並組親子團與小S兩女兒等到台灣新竹的六福村主題遊樂場遊玩，小S當時還戲言安排大女曦文和細女韶恩跟Lucas相睇。
小S買大包玩具
昨午壽星女栢芝與小S又帶囝囝囡囡行街享受親子樂，除Lucas和小S兩女兒外，范范也帶同姪仔赴會，再加另一女友人的孩子，一行人五大五細齊齊到台灣信義誠品書店5樓的親子繪畫區畫畫，小S兩女興致勃勃做小手工，但Lucas似乎興趣麻麻，見他之後獨個兒走到玩具部玩火車。猶記得Lucas前年在新竹遊樂場跟小S兩女玩得十分開心，昨日雖然有大班小朋友陪玩，但未知何故Lucas看來有點點悶悶不樂。
在誠品消磨好一會後，栢芝最終與小S等人分頭離開，見小S和其女兒捧着大包小包玩具，收穫豐富。不過，小S離開時不停與范范交頭接耳，竟未為意細女沒隨行上車，幸最後及時發現，齊齊乘車返回寓所。
撰文：林妃
