一個人生交叉點問題：聽米飯班主話，抑或為國爭取殊榮，當兩者不可得兼，你會點揀？阿仙奴中場韋舒亞就提供咗佢嘅答案：先愛球會！
韋舒亞上個禮拜仲話自己龍精虎猛，暑期踢波冇問題；最近又以體力透支為由，同英格蘭U21領隊皮亞斯傾掂數，唔使參加今夏U21歐國盃，佢話：「呢個唔係關乎一個暑假嘅問題，我實在需要照顧一下自己。過去幾個禮拜，我覺得好攰，而GPS偵測（全球定位儀器，近期阿仙奴開始採用）結果，證明我唔係亂講。」
韋舒亞拒踢U21歐國盃
韋舒亞突用攰做理由，但係人都知佢係受到領隊雲格施壓。雲格一直擔心韋舒亞再踢埋U21歐國盃，下季未開始就已經踢到殘。話時話，韋舒亞唔願做小國腳踢U21歐國盃，但同時間入選成為大國腳，將會踢6月4號對瑞士場歐國外，有啲大細超喎。講番今次英格蘭U21大軍名單（見附表），除咗韋舒亞，之前有列入初選大軍名單嘅安祖卡路爾就稱傷棄戰，到底係真係有傷，定係受到利物浦領隊杜格利殊壓力，就佢自己至知囉。
至於英格蘭大國腳喺6．4對瑞士場波又真係好關鍵，尤其係射手朗尼停賽，韋舒亞角色當然重要。箭頭方面，富咸嘅森莫亞好明顯因為朗尼停賽執隻死雞，有機會同高治、戴倫賓特同埋迪科爾，爭兩個箭頭席位。
平心而論，雲格唔想愛將踢殘呢個諗法都唔難理解，隊波為破錦標荒一定無所不用其極，韋舒亞喺隊波嘅角色越嚟越重要，點可以未開季先殘？另外，法國人日前向球迷大派定心丸，話呢個夏天一定喺轉會市場有好大搞作：「我哋冇可能出5,000萬鎊買球員，但我哋為咗強化隊波，應使就使，呢個會係事實。」阿仙奴躉，信唔信佢好？
英格蘭U21歐國盃參賽名單
《門將》
菲定（打比郡）、積臣史迪利（米杜士堡）、阿歷士麥卡菲（雷丁）
《後衞》
比查特（車路士）、基蘭基比斯（阿仙奴）、菲爾鍾斯（布力般流浪）、文切尼（車路士）、米卡李察士（曼城）、基斯史摩寧（曼聯）、基爾獲加（熱刺）
《中場》
馬克艾拜頓（阿士東維拉）、確克（車路士）、湯卡華利（曼聯）、佐敦軒達臣（新特蘭）、蘭斯貝利（阿仙奴）、梅姆巴（保頓）、魯迪維爾（愛華頓）、丹尼路斯（熱刺）
《前鋒》
史葛冼佳亞（史雲斯）、迪爾科尼素（阿士東維拉）、史杜列治（車路士）、韋碧克（曼聯）、域咸（葉士域治）