田少昨晚出發到歐洲再去英國，睇完賽車、遊艇，最後一站係飛去美國，不過唔係遊山玩水，而係去波士頓睇醫生。
睇嘢有叠影
早兩個月田少招待國家旅遊局官員上自己艘遊艇遊維港，出海時遇上大風浪，田少被拋到半空再跌落甲板，左手拇指斷骨，最弊係撞親個頭，搞到一度失去知覺，而佢清醒之後，仲「斷片」失去一段記憶。
呢次意外手尾長，由於有輕微腦水腫，田少視覺神經可能受影響，直至家睇嘢都仍然有叠影，矇查查好似冇戴立體眼鏡睇3D電影咁。佢噚日同八方講，現時揸車可以由山頂去中環，但唔敢揸得遠，亦打唔到網球，雖然香港醫生同佢講，叠影毛病只能順其自然慢慢康復，但佢覺得應該再問其他專家，因此經老友介紹，今次在英國度假後，就會去美國哈佛大學醫學院搵專家檢查。
田少強調除咗睇嘢有啲問題，身體健康好正常，佢話今次赴美求醫，某程度係求個安心，如果當地專家都話叠影問題冇得醫，佢都只有接受，再畀啲耐性等待復元。八方希望田少下月初回港時有好消息啦。