一位工業界人士對左丁山講：「你唔好咁武斷以為理工大學一定會支持梁振英競選特首。冇錯，振英哥係理大傑出校友，理大都想有一位校友做特首，成為全港第一──因為董特首出身利物浦大學，曾特首出身自社會大學，港大雖然盛產高官，但冇人才去競選特首噃，理大幾威呀！」左丁山立即駁嘴：「如果范太出馬而又當選，港大唔威咩？」工業C嘆一聲：「可惜范太健康唔好，得一個腎，我哋即使支持佢都唔忍心佢去勞心勞力，搞壞身體。」唔，說得有理，講番理大，工業C話：「你應該知道，理大校董會主席，全港唯一女校董會主席楊敏德係紡織界女強人，與唐英年同是紡織世家，份屬世交，兼且挺唐猛將林大輝亦係理大傑出校友，理大嘅最佳立場就係保持中立。」大學係應該保持政治中立嘅，如果向某方傾斜，容易損害學術獨立性。
講得未嘗無理，唐英年畢業於密芝根大學，同董特首一樣係海歸派，如果講到佢與本地大學有無關係，最多只能追溯到佢曾經在○二年被董先生委任為商務局長之前，做過幾個月嘅中大新亞書院校董會副主席，而佢嘅爸爸唐翔千就做過新亞校董及主席起碼二十年。再追遠啲，佢哋嘅遠房先輩唐炳源（行政立法兩局議員，南海紗廠大老闆）係六十年代新亞書院校董會主席，捐過巨款俾中大，中大圖書館就以唐炳源為名，係咁多嘞，但咁嘅關係是否就會得到與中大有關嘅選委支持，目前係未知數。
選特首，范太雖然話會考慮兩個月，似乎仍然係「雙英會」最似樣，吳康民提出鐵三角──范特首，唐政務司長，梁財政司長，大多數係一廂情願。財經界盛傳唐先生嘅幕後大軍師係智多星許仕仁，以佢在政府咁多年，識得大把高官，點會搵振英哥做財政司司長呀，在內閣內招攬「政敵」入場，簡直就係搵自己笨。
即將放暑假嘞，有報導話唐司長即將放長假，為九月後籌謀，梁振英已有自己嘅政策研究班底，辦事又勤力，在報章頻頻推出政策性文章，爭取影響力。大家坐定定呀，九月後有政治大戲好睇！