百年老店香港大學被科大壓倒，在亞洲200間大學排名榜屈居阿二，一哥之名讓予科大。港大校長徐立之噚日出席慶祝百周年活動時話，認為排名可令大學了解實力達到乜程度，但說到底只係數字遊戲，做學問、研究最重要係對社會有貢獻。
其實好多學者對呢啲排名榜一笑置之，八方噚日致電科大教授道賀，點知學者好似范太咁客氣：「愧不敢當。」科大教授話，校內好多人睇完報道後甚為驚奇，因為唔知道排名榜如何計分。佢又話校方暫未有聲氣搞「祝捷」活動，事實上今次僅贏馬鼻，「唔好太高調」。八方問佢日後籌款又多個賣點，教授話未必，反而大學做出成績，對以前捐款者肯定有個交代，前校長朱經武更加居功不小。