飲珍珠奶茶飲到膩？今夏乳酪雪糕彈起。十個食Yogurt九個自誇係靚女，我跟住呢股女人香試味，唔講得食極唔肥，但一定無傳統雪糕咁重口味！一羮，鮮嫩果肉、脆脆餅碎溝乳酪雪糕，軟硬脆口感一齊來，眼口同時吃冰淇淋，咁先為之最好味。
記者：朱崇德
攝影：陳盛臣、楊錦文
Model：YoYo
全自助 磅重計數
乳酪雪糕最近有股新玩法，磅重計數！「Funky」改名叫「MilkyCan」再戰旺角，老闆Jun與Sang係美國回流香港留學生：「乳酪雪糕喺西方國家好成熟，呢類甜品店多到好似星巴克一樣，總有一間喺左近。Funky係香港首批乳酪雪糕店之一，玩Homefeel，家MilkyCan要做得更專業。」唔係講笑，八萬幾一部美製乳酪雪糕機，一開店就四部，望落似提款機，全自助你鍾意唧幾多就幾多，之後自選配料一次過磅重計數。「雪糕優劣取決於製雪糕機，好嘅雪糕機，製造出嘅雪糕唔會有碎砂或冰粒口感。」
乳酪用料方面，佢哋又有堅持：「雪糕係意大利發源，所以用番意大利貨，意國低脂奶、乳酪係我哋底線，入口Creamy味道濃郁好多。」乳酪雪糕唔止玩純原味，藍桑子、芒果、士多啤梨等口味係常客，其他如橙、柑、水蜜桃等味道都會不定期製作，$15/100g就可以試到新口味，另有27種配料全自助配搭。
（旺角西洋菜南街202號/34800711）
鮮乳酪 做雪糕唔溝粉
「SmileYogurt&DessertBar」絕對係間精品級乳酪雪糕店，設計簡約，純白主調色，昏黃燈飾，羅列近十款自創特色口味乳酪的凍櫃，裝修有如西式精緻甜品店，話我知到咗日本甜品屋，我都信。這店以原始風味乳酪雪糕作賣點，雪糕底相當用心，低脂奶配鮮乳酪！負責人Shadow：「好多乳酪雪糕店為慳成本，都會用乳酪粉溝奶做雪糕，我對品質有堅持，每日都用鮮乳酪打製雪糕。」
如果問味道，我會話呢度嘅乳酪雪糕，係我食過最Light嘅一間，乳酪雖清淡，但脷底自有一種鮮活味道。試過之後，你唔會再食街邊雜牌乳酪雪糕，因為你會覺得味道相當死！私房菜式自製配料，都係這店強項，罕見的朱古力班尼斯、桂花啫喱等等口味，我喺出面唔多覺囉。
（九龍城獅子石道65號地下/23826669/ http://www.smile-yogurt.com）
香脆碎 獨家牛油肉桂香
八點幾蒲銅鑼灣，總統《B+偵探》剛散場，戲院栗子、鹹濕花生早成老香港歷史，口淡淡，見到對面街「CRUMBS」聚集成班青春少艾，小背心加超短裙，人龍長期不散，好難抵受呢種誘惑，一於買杯Yogurt舐吓，眼睛食吓冰淇淋。
於我，Yogurt絕對可定性為非主食，軟腍腍一Pet，老實觀感一般，不過這店做的可是乳酪雪糕，又當別論！質地似軟雪糕，一拎出門口，馬上升起陣陣縈繞之寒氣，雪糕面再溶成水汪汪一層，吃一口，味蕾先感受到清淡帶牛奶香，之後是輕輕的乳酪獨有酸味，絕無雪糕甜到漏的封喉感覺。總裁Ada：「雪糕用忌廉做，相對較Heavy，乳酪雪糕由低脂奶加乳酪打成，不但口感較Light，亦更健康。」香脆碎係王牌配料，須知這店靠焗餅起家，用焗曲奇手法製作香脆碎，有濃重牛油及肉桂香氣，配淡淡乳酪雪糕，輕重變化得宜，老土都是一句──越食越停唔到口。
（銅鑼灣景隆街8號1C地舖/27939393/ http://www.crumbs.com.hk）
MakingOf…
用口食乳酪雪糕？男人，都係鍾意用眼食冰淇淋多啲。
