【本報訊】本報記者在警方破案前三日，已得悉有騙徒正利用招聘「神秘顧客」進行詐騙，並成功與騙徒聯絡並相約昨日「見工」，豈料記者見工前，騙徒已落網。
「即日出糧唔拖數」
上周四，記者電郵履歷表到騙徒在網上招聘廣告的個人電郵地址求職，不久一名自稱姓梁的男子回電，記者問他是甚麼公司時，他說：「我哋係服務通有限公司，地址就喺觀塘，你唔信就上網睇吓我哋個網頁，我哋專做神秘顧客服務生意。」
梁在電話中不斷強調做神秘顧客薪金豐厚，每宗調查酬金由60至500元不等，如到銀行申請信用卡、買賣外幣、證券此類調查工作，更可賺取200元以上薪金，零售業調查則只有幾十元。梁又說：「你想返全職或者兼職都得，即日出糧唔會拖你數。」
記者佯稱十分渴望即時上工，梁表示近日很多人開工，約記者昨日（周二）見工，見工時間地點則在前一日再電話落實，掛線前還提醒記者見工時要緊記帶住址證明，他說：「可能到時會叫你去申請信用卡，睇吓人哋啲服務好唔好，唔帶埋住址證明點申請呀？」記者過去兩天多次致電都無法找到梁先生，原來警方周日和周一兩天已採取行動先後拘捕五騙徒。