星美（198）出品嘅《武俠》，喺康城影展可謂威到盡，大家嘅焦點自然落喺全宇宙最好打嘅甄子丹，同湯唯、金城武幾個重磅卡士身上。
星美老闆覃輝同華華講，《武俠》呢部戲查實係拍嚟幫星美「響朵」，康城「叫好」後，8月上畫嗰陣「叫座」就最好，所以佢家忙緊度橋，希望搞個宇宙最強首映禮。
星美搞咗電影10年，整條產業鏈基本上已經好完整，覃輝話，就係因為瓣瓣都成熟，所以今年可以投入更多人力物力拍戲，好似家拍緊嘅《王的盛宴》，由名導陸川執導，搵咗劉燁、吳彥祖同張震做項羽、劉邦同韓信，跟住落嚟每套戲，導演同演員牌面都唔會嘢小。