哎呀！AC米蘭前鋒柏圖喺前日意甲煞科戰掛彩，悶和烏甸尼斯場波傷肩，據講至少要唞4個禮拜，如無意外踢唔到7月1日展開嘅美洲國家盃。換個角度諗，柏圖唔使踢波就可以同熱戀中嘅太子女芭芭拉貝盧斯科尼享受一個較長嘅暑假，陽光與海灘冇走雞！所以，收「咧」戰受傷是禍是福，要問呢隻「鴨」（柏圖綽號「鴨子」）至知囉。
料避戰美洲國家盃
前日除咗英超，其實意甲亦煞科，只係少人留意啫！全日焦點係烏甸尼斯主場對AC米蘭，雖然迪拿達利射失12碼，但佢依然以28球蟬聯意甲神射手；不過因為佢同隊友阿歷斯山齊士食白果，合計入波停留喺40球，平唔到當年迪比亞路同埋查斯古特嘅41球組合入球紀錄。點都好，0:0對烏甸嚟講已經夠數，下季可以再戰歐聯，賽後球場放埋紙炮，同攞聯賽冠軍冇乜分別。
AC米蘭其實都踢得幾hea，睇施多夫被判罰12碼時仲識笑笑口，就知戰意有幾高。柏圖就黑仔，收「咧」戰仲要被擔架抬離場；光頭副會長加里安尼話：「好彩佢冇骨折，唔使做手術；我唔係醫生，不過我睇佢應該踢唔到美洲國家盃。」
照計柏圖傷在身，芭芭拉就傷在心；但諗到愛人唔使飛去阿根廷踢美洲國家盃，多咗時間陪自己，或者老闆女心情反而唔錯。另一個因為柏圖受傷而受惠嘅人，非尼馬莫屬，梗係啦，柏圖本來有機會同球會隊友羅賓奴雙劍合璧，家陣尼馬有望爭正選。
祖記歐霸都踢唔到
烏甸尼斯參戰歐聯外圍賽，全城喜慶，可憐另一斑馬兵團祖雲達斯最後一場只能夠同拿玻里和2:2，連歐霸都冇份踢，個爛攤子好可能交由舊將干地執手尾。
