愛上發公開信嘅陳振聰，噚日又出一封；上次佢不滿被捕而執法機關又不落案，拖足469日，向律政司司長黃仁龍、警務處處長曾偉雄及申訴專員發公開信求助，話咁快又過多幾日，噚日係被捕475日，今次收信人係特首曾蔭權。
曾蔭權喺立法會批評有人「濫用」司法覆核，試圖指令法庭唔好亂咁判案，可能因此令陳振聰覺得向曾蔭權求助有用，陳振聰引用《基本法》、《人權法》，指要佢不斷保釋又保釋有問題，質疑有人濫用權力，又話想不到在21世紀嘅香港，竟然還要靠擊鼓鳴寃向大老爺伸寃。
陳振聰公開信又指政府部門承諾遺囑鑑證完成後會向佢公開結果，但至今未有消息，佢促請政府唔好食言。呢封公開信題為「回頭是岸」，可惜有啲嘢冇得返轉頭，陳生應該同意。