香港回歸前，曾借調中央政策組、歷任立法局議員，以至晉身當時最高政治權力決策機關行政局，成為當中銀行界代表的鄭海泉，最懷念91至95年間立法局「末代議員」的日子，他說昔日議事堂上，可以有不同政見及爭拗，但議會仍像一個「clubhouse」，可以「玩埋一堆」，他與當時其他獨立議員如李家祥及張建東，亦最為相熟。
回歸後，董（董建華）去曾（曾蔭權）來，外界一度揣測，重視銀行界的「煲呔」，或會再度邀請鄭大班入行會，結果由寶哥哥（李國寶）接莊，對未能梅開二度再返行會，今日回望會否覺得遺憾？對政事已不願多作評論的鄭海泉，只笑說，人生「到咗要退嘅時候就要退」。
末代港督彭定康，當年提出的政改方案，與中方關係搞得滿城風雨，曾有政界傳聞，當時仍任立法局議員的鄭大班，收到倫敦老闆浦偉士「call」，直接下命令投票踢走方案，鄭海泉強調絕無此事，「浦偉士唔理呢啲嘢」，純屬自己判斷作出最終投票決定。