新界鄉紳為保僭建，簇擁劉皇叔起義。劉皇叔成個禮拜都未出兵，重俾傳媒揭發佢個「城池」都有僭建，真係出師不利！唔少網民都為新界人呢次革命乾着急，爭相獻計欲成好事等睇好戲。就好似高登討論區，大早就有網民開post，幫劉皇叔諗定呢次革命有乜神兵利器。
石油氣樽殺傷力五星
《新界無雙》兵器篇，網民首推石油氣樽，殺傷力有五星、賣點係「易於收藏家中，俾差佬搜到都吹佢唔脹」。新界地大、人多，唔少人才、戰略重地。網民力推「食力簡」做大司馬（驃騎將軍），貪佢「手下馬房精英座騎數十，威力十足」；另一新界人、時裝設計師鄧達智都備受推崇，必殺技係「批評敵方衣着」打擊敵方士氣。
水貨客日日喺上水出沒，有網民認為佢哋可以「提供物資補給，上至軍用奶粉，下至通訊用iPhone一應俱全」；至於沙田馬場，可提供「戰馬千匹」亦係兵家必爭之地。要成大業還看有冇政黨支持，一向聽阿爺話嘅僭建聯今次反而備受追捧，勝在能「顛倒是非，但使用者或者需放棄良心」，有辣有唔辣。家陣萬事俱備，劉皇叔你仲等乜呀？