港股氣氛偏淡，淡友把握上禮拜五花旗股市嘅跌勢，恒指大裂口低開後市況一路向下，跌488點，報收22711，成交增加至645億元，反映沽壓已經加強。
要留意嘅係下禮拜一係期指結算，淡友家有明顯嘅優勢，結算前好友唔係咁易扭轉局勢，恒指下個支持區喺22450至22650，落到呢個支持區買盤估計會較為積極，恒指反彈暫時會受制喺23000至23300。
華能C輪11722：華能（902）收4.39元，跌1.5%。股價下試4.40元支持，4.30元水平係有力嘅技術支持位，可以諗吓喺4.30至4.43元之間買啲C輪11722，博正股炒上去破4.60元再試4.85元。
隻輪現價29.5仙，2012年3月1日到期，行使價4.98元，溢價20.16%，引伸波幅32.3%，槓桿率14.9倍（有效5.8倍），正股升上4.85元，11722睇50.5仙，升幅71%，正股跌穿4.22元就沽咗隻輪。
俊樺