好多港產電影都有桑拿房傾偈嘅場面，據講由於桑拿房溫度高，裝唔到偷聽器，所以喺裏面多數傾秘密。估唔到，現實生活中都有呢一幕！
話說噚日財經事務委員會討論高盛烏輪事件，代表一班高盛烏輪苦主嘅立法會議員涂謹申，噚日喺立法會「伸張正義」，話高盛離晒譜，又不滿證監會同港交所（388）嘅處理手法。佢仲爆料，有證監會前高層同佢講：「阿涂，呢單嘢你要跟落去。」
根據涂議員講，證監會前高層同佢陳情嘅地方就係桑拿房。不過，剛有身孕嘅涂太唔使緊張，事關阿涂唔係去一般桑拿，而係去馬會嘅桑拿。涂議員話，邊個前高層就唔好講，但「大家真係赤條條咁傾o架！」