等了又等，政府派6,000蚊始終未到手，八方聽聞高官不斷四出收風，密鑼緊鼓制訂派錢方案。然而派錢唔容易，有好多技術性問題要解決，其中一個問題，就係在3月2日宣佈派錢後死咗嘅人，究竟應唔應該有錢收？另一個好多人關心嘅問題，係移民外國港人有冇錢收？如果派錢畀佢哋，點攞錢？
關於第一個問題，做過研究嘅人認為應該以「聽者有份」為原則，即係只要3月2日仍在生嘅人都應該有錢收，因為政府諗唔掂如何派錢只係官僚遲鈍，冇理由因此剝奪市民攞錢權利，可以由遺產繼承人或執行人代領。移民港人攞錢，則可交駐外經貿辦處理；冇經貿辦嘅，網上處理再寄支票係可行辦法。