艾未未俾中共胡亂羅織逃稅罪名，選過特首嘅前首席大法官楊鐵樑（圖）噚日出席新書發佈會時，被問到中國法治問題，楊官仗義執言咁話：「中國幾千年文化都冇講到法治，係人治，但都分好人，同唔好人。」佢話中國要真正落實法治，睇怕都要好似歐洲國家咁「到我哋二、三百歲先有」。
講番楊官本新書《品味英語》，出版5日就要加印，打破出版社紀錄，書展會推出電子版，版稅全數撥捐紅十字會重建總部大樓。發佈會吸引近50名粉絲捧場，楊官講gag話記得當年有個律師結案陳詞時，有段唔識用英文講，竟然提出轉用廣東話，楊官梗係唔批，跟住個律師就話陳詞完畢。楊官笑騎騎話：「如果佢睇報紙，就知我講緊佢。」