除咗馬草泥回歸，噚日仲彈出一個「少年林D9」──代表青年民建聯發言嘅大眼肥仔李世榮。《城市論壇》噚日傾替補議席，由頭嗌交嗌到尾。主持李小薇問台下李世榮，假設肥仔08年跟陳鑑林張名單出選九龍東，touchwood陳鑑林出事，議席畀咗第二高票嘅陶君行，佢服唔服？肥仔笑笑口話，如果畀同一張名單嘅人替補，會有長輩利用呢個「漏洞」特登傳位畀新人。
人肉錄音機上身
呢個時候黃毓民大聲反擊，話劉江華都帶到陳克勤入立法會啦，使乜咁麻煩？肥仔當場爆肚：「一啲啲啦，好彩咋我哋！」小薇追問肥仔點同支持民建聯嘅選民交代，對方忽然人肉錄音機上身，「一辭職個位就傳畀新人，咁樣咪世襲囉。」小薇未等佢講完就話「唔該晒林瑞麟局長」，咁就幫林D9搵到接班人。至於正牌林D9，噚日喺商台節目中話通波仔後血氣運行仲正常咗，家不知幾精神。