如果你有超能力，你會係謙厚善良嘅超級大英雄？還是懶理其他人死活以我為尊？《inFAMOUS》第一集已經玩緊難為正邪定分界，嚟緊第二集強化畫面機能，更加入自創任務玩法，操控雷電嘅超能力更能溝埋冰火。正所謂能力越大，責任越大！
文：阿洛
更華麗更霸氣
2009年5月推出嘅《inFAMOUS》，主角意外得到超能力，可以自己揀做正義英雄或者為殺怪物恣意破壞殺人嘅黑暗王者，呢個極現實殘酷嘅設定令到好多人玩得好過癮。但我就覺得畫面起晒角，主角面目模糊，難以投入，所以無玩。今集就好好多嘞，畫面強化得嚟更靚更多元化，主角亦變得更靚仔更像真，令人投入感大增！
主角Cole繼上集意外得到超能力之後，今集為咗搵科學家幫手嚟到南方城市NewMarais，目的就係擊敗一眾想毀滅世界嘅滅世巨獸Behemoth。對戰場面變得更壯麗有霸氣，更會遇到一班ForcedConduits，奪取佢哋嘅能力，將本身嘅電力溝埋冰火，攻擊招式更多。戰鬥場面華麗過上一集好多倍，仲有中英文合版，大家都睇得明啦！
延續善惡抉擇
業力（Karma）就係遊戲中善惡抉擇嘅系統，謹慎使用超能力守護地球及市民安全，就係善良一方；殺人炸樓當食飯，打怪獸大晒嘅就會當係邪惡！而唔同嘅選線亦會遇到唔同嘅夥伴，善良嘅就會遇到女FBI郭探員，邪惡嘅就會遇到打扮重口味嘅黑人女性Nix。另外，《inFAMOUS2》仲首次加入自由創造任務機能，唔似第一集有個特定結局，而係隨住時間會有不同任務更新，更會有大量新任務下載，呢個設定真係充滿真實感！你層樓仲未供完o架，想死易過！
買起男主角個袋
今次除咗畫面同玩法發大嚟搞外，更會推出《inFAMOUS2》「英雄版」同捆裝，遊戲之外仲有限量版8.5吋主角公仔、真係用得着嘅主角單肩背囊、美國DCComics嘅《inFAMOUS》迷你漫畫第一期同埋一張超級特典卡，更可以下載原聲配樂同埋四款追加下載內容。
《inFAMOUS2》
主機：PS3
廠商：SuckerPunchProductions
類型：動作
人數：1人
發售日期：6月7日
