張栢芝早年因淫照事件而與陳冠希（Edison）交惡，近日兩人卻冰釋前嫌，日前Edison證實喺機艙遇到栢芝，栢芝主動調位影埋合照，Edison日前接受台灣傳媒訪問仲話想同昔日老友謝霆鋒見面，而霆鋒近期就同周杰倫（周董）喺吉隆坡為《逆戰》趕戲，霆鋒噚日朝八點開工，雖然老婆栢芝同Edison重遇事件成為焦點，但見霆鋒工作嘅心情就冇受影響。
親民微笑
噚日嘅戲份講姜皓文追殺霆鋒，現場見霆鋒好親民，仲向圍觀嘅粉絲展露微笑，比起冷酷酷嘅周董更受粉絲歡迎，相信霆鋒有粉絲愛戴，都唔記得栢芝主動同Edison合照嘅事。
此外，大馬童星李馨巧同廖啟智亦有份參與拍攝，自爆偶像係周董嘅李馨巧話見到周董好開心，雖然自己好想做佢演唱會嘉賓，但佢喺現場就唔敢同周董講，認真怕醜。