喺青龍頭豪景花園賣咗18年報紙嘅胡伯，最近被物業管理處趕盡殺絕，唔畀佢喺屋苑範圍賣報紙，街坊幫佢上書屋苑發展商華懋話事人龔仁心求情。華懋發言人同八方講，龔醫生已經收到封信，第一時間轉交屋苑業主立案法團，由於管業處都係受聘於法團，唔輪到華懋話事。
雖然龔醫生冇表態撐抑或唔撐胡伯，不過佢第一時間跟進，八方相信佢幾念舊情。管業處方面稱只係協助法團管理屋苑，已向法團滙報事件，言下之意似乎指係法團落柯打趕人。胡伯話感謝龔仁心代轉信件，而佢噚日開檔時，繼續有人向食環署投訴，食環署人員睇嚟好體諒佢，到場了解後走人，冇採取行動，反映仲有好多人有人情味o架。