大Sir鍾士元加入一個新智庫「大舜政策研究中心」做顧問，其他顧問有城大校長郭位，理大校長唐偉章，執行委員會副主席梁美芬係城大教授，咦，呢兩位校長都與CY有關嘅噃，於是立即引起猜測呢個「大舜政策研究中心」會否為振英哥助選特首？嗱，振英哥係城大校董會主席，亦係理大傑出校友，郭校長、唐校長唔通會支持密芝根大學畢業嘅唐英年競選？不過「大舜」立即否認與任何特首競選活動有關，只不過係就社會經濟議題發表研究意見啫，執行委員會主席何鍾泰話第一炮係研究全民退休保障。
咁多工程界名人、學者，專家匯集成立智庫，點解唔係一開始就研究屏風樓、環評、大橋及基建，而係研究泛民最近不斷講嘅全民退休保障？似乎缺乏說服力一啲噃，大舜應該公開解疑，以釋公眾疑團。
乜唔係啫，「大舜」成員有前港大建築系主任劉秀成議員，前建築師學會會長林雲峯教授，前屋宇署長鄔滿海，前工務局長李承仕，粒粒皆星，佢地唔去研究基建、環保、屏風樓，而去搞經濟學嘅「退休保障」，根本就係以己之短，攻彼之長，實際上係不務正業，呢個議題留番俾王于漸、雷鼎鳴、廖柏偉等一班經濟學者去處理就更加啱。
有咗大舜之後，黎廣德嘅「公共專業聯盟」，比低晒。工程研究講權威，不是講鬥大聲，大舜一下子延攬晒一眾本地重量級工程界人士，將來與黎廣德「對着幹」，勝算甚高。不過以大舜班專業人士嚟講，左丁山都係想佢地為環保與樓價、樓宇供應出謀獻策多啲。上星期有少數人示威，發言者一方面要求停建屏風樓，另方面要求壓低樓價，其實中間有矛盾。起樓如果有高度限制，降低地積比，屏風樓便難以出現，對環保有利，但如此一來，同一地盤可提供嘅住宅單位就會減少幾多吓，單位供應減少便有助推高樓價，建築較少單位而樓價上升，其實地產商可以賺取更高邊際利潤。如果全港新樓宇限建十二層最高，環保人士最高興啦，但樓價必定急升，令無殼蝸牛憤怒，魚與熊掌如何兼得？請大舜班工程專家度吓橋！