按揭證券公司密鑼緊鼓，籌備為老人家而設嘅安老按揭計劃。年紀唔細嘅華華，都好心急想知進度如何，咁啱前幾日喺中環碰到總裁劉怡翔（James），即刻掹住佢問詳情，唔問猶自可，一問就有古仔聽。
James話，有日收到封外觀有啲殘舊同發黃嘅信，拆開一睇，原來係一位老人家代表成班長者朋友寫嘅，內容大致係感激按證公司研發安老計劃，惠及佢哋呢啲退休後冇乜收入，但仲有層樓揸手嘅老人家。佢哋好心急等緊安老按揭計劃出台。James話起初收到封信時，以為十之八九係投訴信，點知呢一紙書箋，原來係一份鼓勵。James話正快馬加鞭，同銀行洽談計劃細節，有信心唔使幾耐，可以向呢班老人家有所交代。