東方表行（398）無論PE或PB，都平通街，趁零售股有勢，又有得諗。東方表行2011年度（3月年結）上半年純利翻咗半番到7045萬銀，已經好靚仔，而集團半年結後，食住「十一」及聖誕消費旺場，加埋今年頭3個月，香江珠寶首飾及鐘錶零售數據全部錄到三成或以上嘅按年升幅，東方表行下半年度一樣肥仔水。係咁意計數，集團2011年度純利翻半番到1.7億銀，預期PE11.7倍，而場內同業，平均PE上20倍，東方表行平咗一截。又東方表行最新NAV3.56元，現價4.66元，PB1.3倍，近磅股票PB亦上到3倍樓上，講PB，東方表行又係平通街。近期零售金飾股先行，呢轉博東方表行現價翻半番到7元，預期PE17.5倍，仲未追到同業PE水位。
廣南價殘博反彈
廣南集團（1203）現價1.50元，啱啱創半年低位，往績PE跌到得番6.6倍，主打馬口鐵及鮮活食品代理業務，長做長有，照計2011年度可以有唔錯增長，預期PE可以更低。又廣南跌到現水位，日線圖14RSI跌到得番20.6，殘到痹，就當博一次技性反彈，都應該有計。短打上望1月以嚟嘅下降軌1.75元，現價回報率約17%，唔係過份。
錢雋