做運動的時候，你在想甚麼？
求學時，至愛打排球，每天上課前都打上15分鐘，小息又打，放學更加打上1個小時以上才捨得離去。10隻手指的指節都扭傷過，紅腫三幾天又會不藥而癒，兩隻足踝「拗柴」無數，趙醒南跌打師傅是我的救星。母親心疼女兒，總是嘮叨：「成日搞成咁，你個腦諗乜呀？」
實不相瞞，我當時一心一意，全情投入想效法小栗純子施展她的獨門絕技「離心獨劈」，可惜，任我如何努力都無補於事。
及長，有段時間愛在早上8至10，去淺水灣游水曬太陽才上班，曬太陽的時候個腦諗住：「點至可以曬得靚啲？」游水的時候則諗：「游出浮台來回兩次，都夠數喇！」
太陽曬到30歲，曬不下去，索性入泳池，死游爛游，定目標20個塘，通常游到第10個上下，我個腦一味同自己講：「其實游10個塘都夠喇，我又唔係要做水怪史畢茲（費斯未出道），唔使咁搏命！」你看潛藏在我腦袋中的魔鬼有幾出力挑戰自我的意志力！
早幾年迷上瑜伽，才發現自己的筋骨沒從前柔韌，每一個本來無難度的動作如今都難過登天，尤其是要hold多5秒，汗水粒粒如黃豆，個腦只得hold住動作的平衡點，否則，如何可以單腳企得住？
最近聘用了人生第一個健身教練，一星期3日在健身房操練，跟隨教練的指示，每個動作都做3set，每set15次，讓我告訴你，這一回真是前所未有的力不從心，每一個動作都是一項挑戰，腿拉得不夠直，踢得不夠高，曲拱的腰腹的張合度太低，橫伸的雙臂又不夠力抓住沉重的啞鈴，哎！原來我身體每一塊肌肉都養尊處優得太久了，脂肪又囤積得出奇地多，渾身使勁仍不得要領，呢啲叫做有咁風流，有咁耐折墮。
天啊！教練還在叫：「仲有5下，雙手用力貼住個身拉直！」這一回，我個腦得3隻字：「我想死！」
文：盧覓雪