雖然只係五月天，但氣溫已升至30℃，出海嬉水啱晒！家市面上有唔少防水相機選擇，由3米到40米都覆蓋得到，真係由游水到潛水都可以keep住chok樣玩自拍啦！
記者：王震遠
攝影：梁細權
Model：Kinki@PureModels
No.1 40米：加殼潛艇
唔係話家啲四防卡片機質素唔好，但M4/3機玩法上始終多變、更有優勢。就好似OLYMPUS嘅PENEPL-2咁，唔少人當佢大機用，想帶佢落水影相，裸跑當然唔得，但用咗防水殼就唔同講法！
專門設計畀EPL-2用嘅防水殼，型號PT-EP03，睇個樣就知佢係專業級潛水用品，上身後陸上型EPL-2都可以到水深40米嘅海底報到。紅色大圈非常搶鏡，重量級外形仲好堅硬，拿上手就知有幾墜手。鏡頭位預留頗長位置，用支14-42mm鏡頭都放得落；加上背後所有按鈕都用槓桿延伸到機外，位置同排序都相近，連對焦都有埋。落水前記緊鎖實開關安全鎖，落深海影珊瑚都得！
查詢：OLYMPUS（23762150）
No.2 12米：靚鏡陪潛水
市面上嘅潛水卡片機定位多為5-10米，PanasonicTough系列嘅DMC-TS3最深就去到12米，仲符合IPX8專業標準。機身採用特別物料製造加強防水力，更改用潛望式鏡頭同加入減震器，增強防撞機能。TS3用咗靚鏡LEICADCVARIOELMAR28mm廣角鏡，最長焦距128mm，4.6倍光學變焦，1,210萬像素，出街游水都夠用。此外，TS3更可拍到1,920×1,080全高清影片，仲有杜比數碼立體聲製作器，強！
查詢：Panasonic（28330955）
No.3 10米：五LED補光
呢部PENTAX出品嘅OptioWG-1GPS，單睇外表好特別，十足十工具箱入面啲儀器，兼且一次過防水、防撞、防塵同防低溫玩足四防。機身採緊密設計，令用家可以喺水底10米進行拍攝，而且最多可以影到兩個鐘咁耐，你攰佢都未攰！它更可抵受1.5米高嘅撞擊力，上水跣手都唔怕跌爛。影相方面，WG-1擁1,400萬像素，仲有「超級解像度」技術提升畫質，鏡頭28-140mm，加埋五粒環迴LED燈，在水底拍攝時可作補光用！
查詢：捷成洋行（29262300）
No.4 5米：拍海底3D相
SONY今季推出嘅四防機款，賣相依舊有一貫的金屬風味。同樣係四防相機，DSC-TX10像素去到1,620萬像，仲有高清影片拍攝同靜態3D相功能，開埋一掃全景真係成個海底都俾佢影晒。機背更有3吋大芒，機身用密氣式結構防止沙塵整壞機，仲有1.5米抗震能力，上山下海都搞得妥。不過水上玩家應該會buy佢可以喺水底5米內頂到1個鐘嘅拍攝能力，仲要有高像素相可以影，又拍到高清短片，估唔到卡片機都可以玩到咁盡。
查詢：SONY（23452966）
No.5 3米：入門級防水
淨係鍾意去沙灘泳池嬉水的用家，CASIOEX-G1就最啱使。EX-G1身形細小，亦都可以捱撞、捱凍，同市面同類相機一樣可以喺-10℃影相，防撞力更驚人，喺2.13米跌落嚟都捱得住。機身最薄位只有19.9mm，但防水能力都唔差，只要喺水底3米內都可以順利進行拍攝，具有IPX6級嘅防水性能。相機擁有1,210萬像素，雖然只有3倍光學同4倍數碼變焦，但勝在價錢抵玩又細部，仲有齊四防能力（防撞、防水、耐寒、防塵），入門級防水DC嚟講算超值！
查詢：捷成洋行（29262300）