職業桌球手、神奇小子傅家俊今個月30號同拍拖三年嘅女友拉埋天窗，恭喜恭喜！受食長齋嘅媽咪影響，傅家俊七年前都開始食齋，仲話食齋後，篤波都精神啲。咁啱未來老婆一家又係食齋，一對準新人特登搵馬會幫佢度身訂做個全齋宴餐單，喺沙田馬場擺廿幾圍。
大家咪聽到個齋字就冇晒癮，當晚嘅菜式包括黑松露如意白菜素湯餃伊麪、黑松露醬松子炒飯、翠竹厚切白靈菇竹笙等等，相當豪氣。準新郎傅家俊話最緊要係選材天然，負責設計菜單嘅馬會總廚師長（中菜）林雲輝話，今次菜式用羊肚菌燉上湯，菜式保持清香味道。咁一圍要幾錢？傅家俊話佢都唔知道喎，皆因未來老婆話晒事。