記協上周五搞周年晚宴，全場紅、白酒均由唐英年贊助，每圍三紅兩白。唐唐係紅酒專家，由佢贊助紅酒，唔少人寄望甚殷，好似醫管局主席胡定旭，未埋位已經向侍應索取酒單，睇完頻頻點頭，顯然收貨。
照顧唔同人口味
八方係紅酒門外漢，請教酒評家劉致新，佢話唐唐贊助嘅酒全屬佳釀，以呢啲醉翁之意不在酒嘅畀面派對而言，可以話係有驚喜。全場最貴嗰支2002年紅酒Masseto，係意大利名釀，市價大約2,700蚊。劉致新形容呢隻酒味道濃郁，價錢同地位喺酒單中最「架勢」，其他幾支酒則值400至700幾蚊不等。
兩種白酒都係法國布根地產區，劉致新估計唐唐係心繫布根地白酒，又大讚佢可以照顧唔同人嘅口味。八方覺得唐唐選酒如從政，最想做到面面俱圓。