【本報訊】胡伯兩天不露面，一班街坊都心掛掛，甫見他即上前問候。「我真係好唔高興！」熟客仔李太直指胡伯被驅逐令她「好激氣」，「佢一啲都冇阻住居民，又幫到我哋，點解唔可以酌情處理？」面對這位表明不惜「公民抗命」力撐的「支持者」，胡伯開心笑道：「呢度啲街坊個個都好有人情味。」
「體諒吓，好心唔怕做」
李太是豪景花園業主，也是胡伯的顧客，她認為胡伯在路邊賣報紙，可便利居民，又不影響行人通道，「對我哋一啲影響都無」。雖然屋苑內有百佳超級市場，李太認為「嗰度賣嘅報紙絕對滿足唔到咁多居民」，認為管業處應該酌情處理，不應趕盡殺絕，「係咪逼到佢又要去攞綜援吖？」
即將遷出的歐先生也讚胡伯風雨不改工作，「人哋幾十歲人搵兩餐，一直相安無事，又唔係妨礙到人，今次係咪有人整蠱佢呢？」林生更坦言多得胡伯18年來一直緊守崗位，「我都方便咗好多，唔使晨早出去買報紙。其實佢用好少地方，一日又用嗰兩個鐘，唔係好阻路，人情上應該體諒吓，好心唔怕做啫！」
得到街坊力挺，胡伯笑逐顏開，大讚街坊有人情味，「有時佢哋過時過節都會買盒餅畀我、或者買啲嘢食畀我，有個街坊年年都封50蚊利是畀我㖭」。他希望繼續在這裏賣報紙，「我唔覺得辛苦o架，幫到人又幫到自己」。