佘詩曼和林峯昨日在東港城宣傳正在熱播中的無綫劇《花花世界花家姐》，早前備受霜峯慾照困擾的林峯，昨日被發現右邊頸上有紅印，對此他即解釋說：「因為拍古裝戴護領所以敏感，唔好誤會。」他表示因外界對《花》劇的反應不俗，故感到相當開心，他說：「以前覺得自己冇搞笑天份，今次係一個新嘗試去做搞笑角色，之後都會試多啲唔同角色。」
阿佘為林峯解畫
同場的阿佘對於林峯在劇中的對白被指有歧視智障人士之嫌，阿佘說：「可能我哋拍嘅時候太投入冇注意到，如果有任何得失令到人唔高興，真係非常非常抱歉，不過我哋都將佢哋（指智障人士）可愛一面表現出嚟，希望帶畀觀眾歡樂，但我哋絕對冇咁嘅意思（指歧視）。」
至於阿佘的經理人被指態度傲慢一事，阿佘表示已看過有關報道，她澄清說：「中間可能有少少誤會，我會想盡辦法去處理，事後都有同經理人溝通過，我哋合作咗十年，大家都合作得好愉快。」她表示雖支持經理人，但也會接受大家的意見，並會作出改善。
採訪：譚倩宜
攝影：陳順禎
