栢芝姑仔謝婷婷昨晚在ifc出席珠寶品牌Qeelin活動，問到阿嫂栢芝與陳冠希（Edison）在機艙相遇，栢芝更主動調位與他同坐更自拍合照，婷婷一聽即說：「我冇睇（新聞），想睇都唔識睇。」栢芝的官方微博曾有人留言否認事件，但Edison昨日在台灣則已承認，婷婷說：「兩個版本我都唔識。」
謝賢勞氣
記者再追問婷婷會否覺得阿嫂此舉不太好，甚至還再玩自拍？婷婷說：「都係傳聞、我唔方便答。」又或者會認為栢芝此舉是放低從前、反而大方？婷婷說：「呢個問題我從來唔會問佢，總之娛樂新聞關於我哥哥、阿嫂、爹哋、媽咪都唔會問，淨係問過一次爹哋係咪真係買車畀女朋友。」封嘴不答是不是不欲事件又再延續下去？是保護阿嫂的行為？她說：「我淨係知自己嘅立場係唔方便講同埋問。」
對於張栢芝母親節當日與陳冠希空中會，她的老爺謝賢昨日在電話說：「關你乜嘢事，你睇到呀，係咪唔畀人撞到?」謝賢十分勞氣，隨即收線。
採訪：李珮洳
攝影：仇志德
