記協ball乃係呢個赤貧團體一年一度嘅籌旗大會，今年業績唔錯，幾個拍賣項目共為記協進賬大約28萬。當中最大宗交易係南太電子創辦人顧明鈞捐出嘅一支紅酒，由文具大王杜振源以10萬元投得。壹傳媒主席黎智英嘅6月6日6點魔鬼飯局亦大受歡迎，七個席位分別由五位善長投得，包括地產代理商汪敦敬、律師會副會長何君堯等，合共盛惠7.5萬。
叫老闆加多啲人工
今年嘅主禮嘉賓係港交所行政總裁李小加，佢一啲都唔小家，唔止義務幫記協籌款，仲私人醒咗件翠彩精靈靚花樽出來拍賣，結果由金利豐老闆娘朱李月華以6.8萬投得。李小加喺致辭時候仲幫全港記者打氣，呼籲傳媒老闆賺咁多錢唔好咁孤寒，加多啲人工畀新聞從業員。
為記協出錢出力嘅仲有好多名人，國際巨星周潤發捐咗張攝影作品出嚟，賣到3.8萬元，得主係瑞安主席羅康瑞。加上兩個表演環節，蕭炯柱指揮嘅樂團，同埋區新明領導嘅合唱團，記協全晚收到接近50萬嘅捐助，不過同舊年接近80萬相比就差啲，可能係關愛基金搶咗太多富豪錢，搞到記者受關愛嘅指數下挫。
噚晚仲發生一段插曲，話說一男一女不請自來，晚宴開始前坐喺一張工作人員席上，仲袋走枱上嘅紀念品同禮物。記者圈人數話少唔少，所以初頭冇人察覺異樣。不過金鐘萬豪酒店侍應夠機警，發覺呢對男女形迹可疑，思疑佢哋過往都嚟過其他晚宴白撞，於是通知記協負責人。記協總幹事莊曉陽隨時上前問佢哋來自邊間傳媒機構，對男女支吾以對。記協馬上報警，不過女嘅好快咁閃咗，男嘅就被警察截到。
mailto:[email protected]
