中環中建大廈名醫雲集，係有名嘅「醫生樓」，不過遲啲可能大執位，事關對面街嘅娛樂行近期有樓面租咗畀醫生，日後可能更多名醫進駐。
賭王四太05年以27億元買起娛樂行，據講之前冇醫生租客，近月開始接受醫生洽租，率先掛牌嘅係兒科名醫周笑顏。周醫生之前間診所喺中建8樓，樂壇天后Kelly第日帶蝦餃仔搵周醫生時，就要去娛樂行18樓嘞。
有後門方便名人客仔
周醫生鄰居係喺威院出嚟私人執業嘅兩個耳鼻喉專科醫生GordonSoo同FrederickWong，兩個人拍檔開咗間耳鼻喉面部外科中心。診所本來位於太子大廈嘅血液及血液腫瘤科醫生陳雲斌，據八方所知亦睇中娛樂行，傾得成嘅話，診所稍後亦會搬到娛樂行。
名醫大執位，其中一個原因係娛樂行租金較低，據講呎租大約70幾至80幾蚊，較中建或太子大廈呎租要成百蚊平，而且樓底較高，如果診所要裝置醫療儀器，亦比較方便。有睇過盤嘅醫生話，娛樂行仲有一個好處，就係勝在有後門，對病人嚟講可以確保私隱，名人幫襯至安心。
另一醫生則話是否搬診所要睇好多因素，租金水平只係其一，其他配套都好緊要，好似太子大廈咁，雖然租金係貴啲，不過有24小時中央冷氣，夜晚周末都可以睇症，搏殺嘅醫生，啱晒。
mailto:[email protected]