型過棍波版　黑腳STI　爆飛300匹

型過棍波版　黑腳STI　爆飛300匹

Subaru呢輪狂谷WRXSTI，不停換裝上陣，彷彿不受地震無新車輸港影響。最新搞作係將A-Line自動波版Facelift埋，新款頭唇已夠懾人，更換上四條啞黑輪圈，加上300匹馬力，跑起上嚟比棍波版更具霸氣。

記者：徐影龍
攝影：梁細權
Model：Rika@GME

啞黑輪圈勁有氣勢

啱啱一年前，WRXSTI到港，仲係首配自動波嘅A-Line版，已經令更多人投入經典辣跑嘅懷抱；早排推出嘅手波版，更係Facelift版本，賣相更潮更型。估唔到A-Line都唔執輸，嗱嗱聲一併Facelift埋，換上2011新款頭唇，齋睇立體層次、線條有力嘅霧燈位置，已令新舊Fans有衝動換車，今勻A-Line更換上四條18"鋁合金軨，全啞黑上陣，襯喺純白車身上，的確比棍波版嘅銀色軨更添霸氣。四條黑軨在馬路上飛轉，就算未爆盡300匹驚人馬力，已足令一眾街飛企埋一邊，仲未計第一神器全時四驅系統，入彎咬地、起圍有力，配合2,800轉已到達最強扭力，就算揸自動波，一樣充滿昔日街霸風采。

■拉闊鬼面罩、Turbo生風入口，令STI充滿霸氣。

■馬路上奔馳，黑軨飛快運轉時更為懾人。

■到港為揭背款，令車窗跟尾部更流線。低扭有力，加上全時四驅，自動波STI並未丟街霸之名。

軚盤＋/－　一樣好爆

我都知棍波係男人嘅浪漫，好多忠心Fans仍擁護住棍波STI，不過到咗我呢類三十幾勾嘅男人，浪漫之餘都係實際啲好，喺香港呢個頻頻塞車嘅地方，一個D波走天涯的確舒服得多。當然我仍未放棄我嘅浪漫，入到如清水灣呢類郊區，仍可轉入+/-波模式盡情爽一爽，喺軚盤度輕輕鬆鬆啪兩啪，拖波升波全控兩指之間，一樣咁好玩。對日日返工嘅都市人嚟講，+/-波其實嚟得更實際。
跟Facelift前嘅STI一樣為揭背車款，當然比三廂式有尾款更實用，呢點亦係港人近年極Buy嘅車型，好處係尾箱空間更闊落，尾門亦變得較大，裝嘢同攞嘢都更方便，令呢款辣跑都可兼顧實用性。

■連自動波版也Facelift了，襯上獨有啞黑輪圈，實在夠晒招積。

■內櫳並未刻意「飛仔化」，反倒變得豪華舒適。

■火紅錶板跟軚波映入眼簾，挑起你戰鬥慾望。

■自動波版獨有SI-Drive，轉入SportMode一樣玩得好激。

■一個D波走天涯，嬌柔女仔一樣啱揸。

SubaruImprezaWRXSTIA-LineProfile

引擎：2,457cc水平四＋Turbo
馬力：300ps/6,200rpm
扭力：35.7kgm/2,800-6,000rpm
傳動：5速+/-波箱，全時四驅
售價：$386,593
查詢：Subaru灣仔陳列室（25112727）

■車尾線條頗具層次美感，令人感覺相當有勁。