噚晚八方去咗記協年度晚宴，新聞工作者難得一年一度齊齊整整同行聚餐，整體氣氛尚算歡愉。不過呢行甜酸苦辣樣樣有，當大家走埋一齊總結經驗嘅時候，難免又會湧現好多不敢回憶未能忘記嘅慘痛烙印。
由記者行家組成嘅九唔搭八拉雜成軍合唱團，噚晚唱咗兩首歌，一首係《齊齊整整》，唱盡記者與家人聚少離多嘅苦況。一首就唔知係歌定係歌劇，合唱團又唱又朗誦咁，講咗記者過去一年嘅四件心酸事。當中講到有位女記被老細老點咗去美容院放蛇，女記要扮晒好想隆胸，結果慘遭美容院職員搓胸。呢幾件事無非想呻吓，記者尊嚴一再受到踐踏。所以記協噚晚嘅紀念品係一樽鹽（圖），唔知係諷刺定係互勉。
mailto:[email protected]