44歲的梁思浩近日頻頻成為新聞人物，繼被傳大班鄭經翰以1,500萬力邀他過檔新電台後，他上周又突然被效力17年的香港電台炒魷。不過，思浩不但未有數臭港台還擊，反而感激港台讓他成為最受歡迎DJ首位。另外，思浩又感激監製李添勝當年鬧他是垃圾，令他得以發奮用功演好《城市故事》的洗米華一角。
撰文：戴彩煥
港台高收聽率節目《瘋Show快活人》主持梁思浩，上周五突然被港台叮走，有傳是思浩拒跟港台簽不跳槽合約而遭解僱。然而，塞翁失馬，焉知非福，盛傳鄭大班（鄭經翰）新成立的香港數碼廣播以1,500萬力邀思浩過檔，酬勞比港台舊價何只十級跳升！
猶記得思浩2004年不獲無綫續約時，曾召開記者會數臭無綫，但今次思浩被港台解僱後，卻仍處處力撐港台，令人感到有點莫名其妙。對此思浩昨日接受專訪時解釋說：「人長大學識體諒，君子不出惡言，我唔會再好似以前咁。可能個心闊咗，得到多咗，所以唔再介意失去。我真係好多謝港台，畀到個平台我，令我攞到最受歡迎DJ第一位。」
總得貴人相助
思浩表示每一次受到挫折，總得貴人相助。如01年他遇襲，令他一度以為演藝生涯玩完。思浩說：「嗰陣好徬徨，要睇心理醫生，醫生問我有乜嘢會令自己開心，我話煮嘢畀人食，見到人哋食得開心，自己就會開心，結果01年我同人夾份開私房菜。」04年，思浩約滿無綫後不獲續約，正當他感到彷徨之際，港台canteen老闆聰哥和聰嫂斟他合作開糖水舖，結果生意越做越旺，分店越開越多。
還有一位貴人，思浩要特別多謝，他正是無綫金牌監製李添勝。思浩說：「我第一部處境劇《城市故事》係添哥做導演，嗰陣時自己仍然返緊學，唔單止唔知乜嘢叫拍戲，連讀劇本都唔識，淨係耷低頭數住第幾句對白到自己講。一個月之後添哥終於忍唔住捉住我喺後巷鬧，佢扯晒火話：『你知唔知做緊乜？你垃圾嚟，唔明點解TVB簽你呢啲垃圾！』我問佢點先至唔係垃圾，佢就叫我過去一廠睇吓拍緊《新紮師兄續集》嘅梁朝偉同劉青雲點做。」
向梁朝偉偷師
思浩續說：「之後我每日收工就過去一廠睇偉仔同青雲點做。有日偉仔走埋嚟同我傾偈，跟住話我聽點做，佢話用個心去做，當係平時生活咁。」
結果數月後，思浩演技大躍進，獲添哥盛讚同時，他演的洗米華一角更街知巷聞，令思浩一炮而紅。思浩有感而發說：「當年冇添哥鬧我垃圾，就唔會有洗米華，唔發生01年件事，我就唔會開餐廳，04年TVB唔係唔要我，我就唔會開糖水舖，所以每一件事都有一個啟發。」
嘆不懂愛人
梁思浩的性取向一直成疑，昨日記者問及他的感情世界時，他未有正面回應，只笑說：「呢個世界好大，愛係好簡單，但我唔好彩，到家都搵唔到自己愛嘅人，無論女又好，乜人都好，都冇出現，因為我要搵錢，可能我細個冇愛，所以大個咗都唔識愛人。」
思浩小時候，父母離婚後將他遺棄，令他從小缺乏愛和安全感。
有錢有安全感
思浩說：「我冇安全感，我嘅安全感係嚟自錢，有錢就有安全感。所以一直以嚟我都好努力搵錢。以前一日24小時我做足20小時，仲有乜感情世界吖？忙到想識個人都冇！」
