記得當年摩連奴話過阿仙奴領隊雲格係偷窺狂，終日打聽人哋家事，而懷疑佢會喺人家屋企裝上偷聽器盡情窺探。雲格點對敵人就唔知，但佢對自己球員，以後就唔使偷偷摸摸。皆因有消息話佢將會採用全球定位儀器GPS偵測球員動向。簡單啲講係將感測器放喺球員波衫，從數值了解佢哋嘅狀況。
咪以為呢個措施只適用於球場內，話說有位兵工廠球員早排操操吓突然要返屋企攞番啲嘢，但唔記得除低個感測器，於是球會清楚佢嘅一舉一動。呢單嘢就咁睇係笑料，但雲格為咗重溫錦標夢，會唔會將呢個措施伸延到球場外？真係冇人知。
如果雲格到時連球員私生活都偵測埋，啱啱被召入U21歐國盃英格蘭決選名單嘅韋舒亞（小圖右），點敢再蒲吧或者開快車？賓特拿點敢掛住結識富家女子而唔操練？正如尹佩斯（左圖）所講：「家陣做球員甚艱難，我哋私生活冇晒囉。」講開尹佩斯，有傳阿仙奴打算出9萬鎊同佢續新約，而據講呢個已係球員薪酬上限，同其他頂級球會比，差一大截咯！