一億彩金六合彩當然吸引，圈中藝人也議論紛紛，有部份更準備投注碰碰運氣。
黎耀祥：我個人好冇大志，知自己要捱世界，我哋呢啲衰人中咗六合彩就不事生產，遺禍社會，所以都唔期望自己中獎發達，但今次有啲興趣，1億獎金好吸引，講起我都三五七年冇買過，我連安慰獎都從未中過，今次試一試啦，如果中獎會捐錢，跟住買間大屋。
高海寧：我周圍嘅人都係討論緊1億六合彩，全城轟動呀，個個都話去買六合彩要排好長隊，但我都心甘情願排長龍嘅，當買一個希望都好呀。
胡杏兒：啱啱上期嘅七千幾萬我都有叫家姐買，中咗三個字，好似有40蚊，都唔錯啦。今期我都會買，買一條七個字、一條八個字，再加一百蚊五條電腦飛，大包圍。如果中咗即刻買層3,000萬豪宅，買架300萬跑車就夠喇。
黃宗澤：以前有啲派彩勁嘅，都會叫阿媽買，湊吓熱鬧，但冇運，都係中過幾次安慰獎。今次我會買，但呢啲嘢係你就係你，我睇得好開嘅。如果中咗都會繼續做，又唔會咁快結婚，1億好快使晒，買層樓都幾千萬啦，所以中咗會買間複式dreamhouse。
