查案警匪片永遠受歡迎，可以參與其中就更加過癮。呢隻《L.A.Noire》就以四十年代充滿罪惡嘅洛杉磯為背景，最犀利之處就係人物表情極為真實，戚眉戚眼、眼神煥散就九成九有嘢隱瞞，扮演偵探嘅玩家係人係鬼邊個心虛，一眼就要睇得出！玩過之後你就會明點解你女朋友知你噚晚唔係開OT。
文：阿洛
血腥罪惡大人Game
劇情玩法有啲似之前PS3隻《HeavyRain》，遊戲採用類似《GTA》嘅自由冒險玩法，不過今次就唔係殺人放火金腰帶，而係扮演偵探。查案開車撞倒人過關後仲要扣分，無錯，因為你係差人，而且仲要做好人。講到多元化亦唔輸蝕，當中包含咗偵查案件、找尋線索嘅解謎成份考你耐性同智慧，同時亦有車輛追逐同埋激烈槍戰等你暢快一下。而且血腥及加鹽場面都唔少，奉勸細膽仔或者細蚊仔都係玩多次「機戰」算罷啦。
真實版分屍案改編
真實感極強！忠實重現1940年代，戰後充滿暴力、罪惡嘅洛杉磯，道路街景甚至路人打扮同馬路上嘅汽車都跟到足，而且採用四十年代荷李活黑白電影（FilmNoir）嘅警匪片風格，以光與影幻變流動嘅取鏡呈現錯綜複雜嘅懸案氣氛。玩家扮演偵探主角ColePhelps，而主線大案更加係參考四十年代喺洛杉磯發生過嘅真案件改編而成。講緊嘅係1947年一件殺人分屍案，當中被害人係22歲嘅女演員ElizabethShort，被凌虐分屍棄置路邊。當時經過三年調查，涉及超過1,000人嘅問話，至今仍然未偵破！而主角就要由淺入深，慢慢從處理嘅交通事故、兇殺案、縱火案等不同case入手，抽絲剝繭。
分辨臉部表情過關
遊戲好玩之處，係玩家要好似真實偵探咁睇清楚邊個證人可信？邊個有嫌疑講嘢無句真？呢種叫做「MotionScan」嘅技術，可以捕捉真實演員臉部表情嘅細微差異，玩過就知game中人講嘢時嘅表情像真度極高，效果極好。查案時玩家要從佢哋嘅小動作或表情，判斷唔同角色嘅反應，落完口供就要揀你信唔信佢，而唔同選擇就會換嚟唔同嘅劇情發展。
真實入戲
《L.A.Noire》
主機：PS3/Xbox360
廠商：RockStarGames
類型：冒險
人數：1人
發售日期：5月20日