昨日提及公僕鍾意開新project，放諸四海而皆準，香港可能較為冇咁着意㖭。譬如話：要為清貧學生提供mentorship（中譯：學長制），由社會上嘅有能之士做義工，撥出時間輔導學生，為佢地解答疑難，認識社會，教導新知識等等等。呢個概念非常好，工會民生福利派議員唔會反對，但實行起嚟，要億億聲撥款嘅噃。用來做乜？嗱，搵位D2高官負責其事啦，下面要有AO、EO、文員等等啦，租層寫字樓啦，呢個office負責搵義工做學長，與學校聯絡選學生，安排一切……。真係在在需財，納稅人嘅錢就是這樣用的，大部份用咗在公僕身上，如果由左丁山話事，啲錢應該撥給幾個以至十個不同NGO，由NGO去用現行架構辦理。
左丁山同一位政治記者講起，佢話左丁山甚為天真，假如政府將一啲項目交畀NGO（非政府志願團體）執行，就會引發一場利益爭奪戰，有「官團勾結，輸送利益」之嫌，釀成政治問題，佢舉一個例，關愛基金撥款資助遊學一事，應該係好嘅，但由邊個辦理遊學團呢？政界傳聞，民建聯方面早有辦理大陸遊學經驗，一旦關愛基金撥款，與民建聯有關嘅商社，會笑到四萬咁口，相反泛民就會黑口黑面，點都要鬧遊學幾句，唉吔吔，左丁山果然天真，原來又有不少利益關係糾纏不清。左丁山係遊學贊成派，與其係咁，關愛基金嘅資助，不如直接撥畀學校，譬如中學與加拿大某中學辦暑期/復活節交流，窮學生冇錢參加，但如學校得到關愛基金撥款若干，就可以有名額畀呢類學生入團啦。
政黨爭利益，係政治嘅自然生態，不足為奇，大家不必認為政黨真係為人民服務，服務之餘有利益o架！經政治記者一提，醒起不久前一位親戚家住北角，想話請一位鐘點家庭傭工，打電話去一個民主派工會詢問，得到嘅答覆就係：「你住喺北角呀，問工聯會啦！」於是佢照做，即刻搵到鐘點女傭，佢然後明白，工會各有地盤利益，唔會亂咁踩界！