今日全城熱話非「你買咗六合彩未？」莫屬。六合彩連續8期冇人中頭獎，今晚舉行嘅六合彩攪珠，頭獎如果一注獨中，預計獎金達1億元，創下六合彩史上最高派彩紀錄。華華噚日經過中環，投注站逼爆排隊人龍，就連港交所（388）主席夏佳理都湊熱鬧，跟同事一齊買番條飛，碰吓運氣。
華華問佢買咗乜，佢話已經買咗條複式，9個冧巴，盛惠840蚊。主席即係主席，連買六合彩都豪氣啲。話就話同公司6位同事夾份，但錢就佢畀晒。噚日《蘋果日報》頭版女神周秀娜貼「6」號做膽，華華叫夏佳理都畀個心水冧巴，佢貼「39」號。咦，39號係生命動力（039）嘅上市編號，此股核心產品係乙醇，因利成便生產埋酒精飲料。如果呢個冧巴命中，就真係值得飲番杯慶祝。
7個人夾份驚分唔勻
講開中獎，夏佳理同班同事亦都已經計埋數，如果中獎點分。由於計埋佢本人合共7個人夾份，頭獎一注獨中，1億蚊實分唔勻。其實好簡單，夏主席可以先撥出部份獎金做善事，餘額先至均分咪得囉。聽三姑六婆講，天降橫財都要捐啲出去，等有需要嘅人受惠，咁呢筆橫財先至袋得穩o架！
李華華
mailto:[email protected]