不需刻意放大，但精明的你總留意到，每個類別如時裝、飲食，都定期擁有代表性Icon，如阿徐阿Y代表時裝，蔡瀾代表飲食，見到他們就知道接着幹甚麼。就如見陳豪，除了代表筍盤，有咖啡的地方就有他！就在會展舉行的咖啡師大賽及拉花大賽現場，他亦身在其中，當然，他不是13位參賽者之一！
記者：吳美美
攝影：王文忠
點解陳豪愛烘焙？
在場的陳豪，熱愛咖啡，自己又有否幻想過自己站上台與人拉花鬥一番？「真係無諗過自己會棟喺度冲咖啡！我鍾意咖啡，喜歡同人share個taste多啲，但完全無渴望過比賽。因為真係嘅話要重新開始，我成日拍劇都無呢個時間啦，都係鍾意烘焙咖啡過程多啲。」
第一屆拉花大賽
上星期六（14日），會展正舉行HOFEX國際食品餐飲展，各界人士於尾聲之日入內發掘美食時，有13個正在與咖啡為伴，與陳豪身在同一個展區內，為的是等待「GrandLatteChampionship」（GLC）拉花大賽及「GrandBaristaChampionship」（GBC）咖啡師大賽正式比賽的一刻。
相信是基於人數及時間考慮，GLC總決賽先於早上開始，下午隨後再進行GBC總決賽。由於今年是是第一屆GLC比賽的關係，而三位能進入總決賽的咖啡師年齡只介乎22至23歲之間，年資更只有一至三年，外表仍然像學生的他們，當中一位將成首屆拉花大師得主，所以更吸引在場人士放棄周邊魚子醬、Gelato、魚生試食走來圍觀。
兩分鐘即場模仿
請大家不要以為，參賽者只要隨意拉出自己鍾意的圖案如HelloKitty、Snoopy就可以完事，贏得在場人士一聲「卡娃兒」就可以鬆人。實際是，每位參賽者要面對四項挑戰，當中包括三個指定動作及一個自選動作。大會將安排三位分別來自澳洲、台灣、韓國的表演嘉賓（亦是評判）於指定動作環節中示範表演，記住！嘉賓是即場拉出圖案，事前完全唔知會拉花定拉雀。參賽者有一分鐘的時間參考及考慮用大杯或小杯，用後者的話，因其空間較小致複雜性增加關係相對會高分，再給予兩分鐘的製作時間，模仿評判的拉花，務求似到足就最好，最後仲有自選圖案。每次令在場觀眾細細聲談論的環節，必是三位參賽者將作品放在桌上時，與嘉賓作品同時對比，四杯圖案哪杯相似即時見高低！
外行人如小記，單看就覺得難度高，如來自台灣，曾奪台灣咖啡師大賽冠軍的林東源就拉出了鳳凰圖案，大師完全沒有放水的餘地，至於評分準則他又點睇？「首先參賽者要了解我示範時所用到的材料及份量，亦盡量不要浪費材料，如牛奶用剩都會影響分數；另外顏色方面，越做出對比效果亦是越高分。」
拉花不只人開心
賽果至下午才公佈，當然讀者們已經不用再等，勝出的是，阿Kim楊曜輝，聲明一點，他是唯一一個能同時進身GLC及GBC比賽的咖啡師，後生仔，大把前途！前面講過，三位參賽者年資真的尚淺，阿Kim亦只是入行僅一年，上年七月頭才入行，之前是一個剛於工程系畢業，走到office擔任臨時文書工作。後來嫌自己工作真的太悶啦，才從頭細想未來在何處，而唯一夢想是想開可以與人分享的咖啡店，學咖啡之心便由此躍起。
賽後與阿Kim傾了一陣子，他帶出了拉花的出現並不等同賺錢買花戴，而是有其存在的重要性，「大家其實唔太了解拉花嘅意義，以為純粹人開心。但做到一個圖案出來時，杯咖啡就代表唔會差得去邊，因為要將咖啡與牛奶溝得勻，無論左右喝時味道都相同。」講得好啱聽，飲得開心又睇得開心就最perfect！
兩個月新手擊敗老師傅
阿Kim年資僅一年奪冠已夠勁，但今年第三屆GBC的冠軍仲厲害，阿Ming周祥明只有兩個月調製咖啡經驗，以極度新人的情況下擊敗當中入行7、8年的「老師傅」，亦是總決賽的唯一女性，巴閉巴閉！還記得比賽時，第一位出場的她，一副信心十足輕鬆自如的狀態比賽，完全看不穿身手只有兩個月的功夫。「我諗我贏係因為自己完全無壓力，老師都係叫我嚟攞經驗，只係平常心。」得獎後，阿Ming紅住眼咁講。但經驗淺唔代表無準備，事前將「缺陷豆」逐粒挑走，因為「一粒都會影響味道」，再運用在職訓局時所就讀的一個月有關咖啡知識課程所學，選出了哥倫比亞豆、萬特靈豆及巴西咖啡豆混合作賽，務求穩陣應戰。
我想阿Ming的爸爸應該很欣慰吧，始終阿Ming是不想繼承家族的辦館生意而投身咖啡店的。幸好當初未有極力阻止，否則，香港又少了一位充滿天份的女咖啡師了！
比賽準則
說回比賽準則，參賽者須於10分鐘內調製四款不同的咖啡：包括四杯濃縮咖啡、四杯意式牛奶、四杯自由創作咖啡，例如滴漏咖啡、法式壓壺等。最後，就是「拿鐵速遞」，是質與量的大考驗（不是越多越好，只要一時貪快大意之下影響咖啡味道就會被扣分），參賽者須於限時內盡量冲煮最多杯8安士外賣拿鐵咖啡，同時要拉出漂亮的拉花圖案，若能每杯不同圖案則會加分。評審將抽取其中一杯，作口味和外觀評分，其餘的派送現場觀眾飲用。小記試飲了其中參賽者的一杯，還記得面層那陣泡綿滑得不得了！
小記最like！
除咗咖啡味之外，setting靚與否都會影響分數！以下呢三款就係小記最like：
