專吼新股上市攞招股書去賣嘅「執紙黨」，以後可能少咗搵錢機會。港交所（388）今年初容許新股轉用電子招股書，近期招股嘅中國地板（1822）同美高梅中國（2282）將會採用。華華聽聞兩間公司會印少一半以上招股書，以美高梅為例，由原定印6萬本減到2.5萬本。
早排匯賢（87001）招股，破紀錄開咗100間收票行，印成20萬本招股書。之前有環保團體磅過，一本招股書平均重1.94千克，以回收商收緊每斤紙9毫嚟計，一本招股書拎去賣可以收返3蚊左右。
不過，根據電子招股書指引規定，只需喺收票行擺3本實物招股書畀人睇，畀人拎返屋企嘅招股書數目就可以大減。聽聞美高梅中國班外籍老闆非常支持環保，一早打算用電子招股書，今次只開24間收票行，其中得4間有書攞，分別位於中環、旺角同觀塘。佢哋仲特登用再造紙印製彩色單張，放喺收票行，話畀人知如果想攞招股書，可以去邊。