【本報訊】小肥的主診醫生兒科專科余醫生行醫至今十多年，曾治理不少BMI超過35的肥胖兒童（14歲或以下兒童BMI在19或以上即屬肥胖，小肥BMI高達53.3），需要入院治療的個案近20宗，情況較輕的門診個案「多到唔記得」，可見香港肥胖兒童的情況普遍。余醫生說，以往處理的個案中，成功減肥者約佔一半，失敗個案多因家庭未能配合，余坦言：「如果屋企合作，成功機會就大；如果屋企冇決心，好難」。
「要有耐性同毅力」
余醫生說，以往成功個案中，不但小朋友要嚴控飲食，全家都要跟小朋友一起依營養餐單進食。「如果父母大魚大肉，小朋友都唔肯鹹魚青菜啦。」根據余醫生經驗，失敗例子多因父母未能配合：「好多時係父母唔夠關注，因為要出去搵食，冇時間睇住小朋友，任佢喺屋企亂食嘢。」
他表示，小朋友減肥跟成人不同，因正值發育時期，要顧及營養需要，因此「唔可以地獄式咁短時間內減好多」，必須持之以恒。以小肥為例，要回復正常體重，一星期只可減0.5公斤，共需兩年時間。余醫生勉勵小肥父母：「要有耐性同毅力」。