英超今個禮拜日煞科，其中一場焦點賽事，就係提早攞咗冠軍嘅曼聯，喺主場對護級嘅黑池。坊間傳言曼聯睇中黑池隊長查理阿當；查實紅魔4年前都有前科，煞科戰主場輸0:1送3分畀韋斯咸後，間接幫對方護級，事後仲簽埋奠勝嘅泰維斯。唔通呢個巧合，今年又喺奧脫福出現？
黑池家喺英超排尾3，只要作客奧脫福攞到分，就有機會保住個英超席位。由於曼聯經已贏咗今季聯賽錦標，而且下周六要同西甲巴塞隆拿爭歐聯獎盃，唔少人都擔心領隊費格遜會出弱陣，所以英超聯賽會亦事先張揚，如果紅魔只派弱陣輸波，或會被紀律處分。費Sir賽前就話：「提早封王令我哋有機會畀主力回氣，但我哋亦有責任確保對其他打緊護級戰嘅球隊公平。一句講晒，對黑池場波我哋會全力爭勝。」另外，後衞里奧費迪南亦話，唞得太耐會影響狀態，所以寧願喺鬥巴塞前繼續keep住落場比賽。
07年煞科 紅魔有前科
我求大俠認為，派主力定副選落場唔係重點，關鍵在於曼聯係唔係打真軍。好記得09年嘅英超煞科戰，佢哋為咗留力打3日後對巴塞場歐聯決賽，排個弱陣鬥侯城，結果憑吉遜嘅入球贏1:0而回；但07年最後一場聯賽對韋斯咸，佢哋個陣有雲達沙、費查同朗尼等正選，C朗同傑斯亦後備落場打咗30分鐘，但最後卻輸0:1。最巧合嘅係，幫韋斯咸奠勝嘅泰維斯，事後亦成功過檔曼聯，事後有人揣測，韋咸為咗護級，就用泰維斯同曼聯換3分。
曼聯今季喺奧脫福打英超，戰績係17勝1和，加上陣中粒粒皆星，所以就算真係留力，要贏黑池依然話咁易。聽聞曼聯對黑池中場查理阿當好有興趣，於是有小道消息傳出，話黑池可能會學韋斯咸咁，用球員嚟同紅魔換分，但流定堅，到時就有答案。
另外，因批評球證韋比而俾英足總告嘅費Sir，擺出一副闊佬懶理嘅態度，搞到曼聯要幫佢執手尾，代佢同英足總書面解釋。雖然費Sir咁唔畀面英足總，但竟然冇事，最終只係被警告了事。
